Н.Н.Буличның тууына 190 ел тулу уңаеннан

Татарстан Республикасы Милли китапханәсенең кулъязмалар һәм сирәк китаплар бүлеге тарафыннан «Казан университеты рус теле кафедрасының атказанган профессоры» дигән темага күргәзмә оештырылды. Ул әдәбият белгече, Петербург Фәннәр академиясенең мөхбир-әгъзасы, Казан университетының беренче историографы һәм Казан җәмәгать китапханәсенең «шәрәфле күзәтүчесе» Н.Н.Буличның (1824–1895) тууына 190 ел тулуга багышлана.

Николай Никитич Булич 1845 нче елда Казан университетын тәмамлый. 1850 нче елдан Казан университетында: 1854 нче елдан – профессор, 1862– 1864, 1875–1878 һәм 1881–1882 нче елларда – тарих-филология факультеты деканы, 1864–1871 нче елларда – проректор, 1882–1884 нче елларда – ректор. 1865 нче елдан шәһәр һәм җәмәгать китапханәләре белән идарә итү комитетының мактаулы күзәтчесе, соңыннан әгъзасы. 1880–1890 нчы елларда земство эшчәнлеге белән шөгыльләнә, өяз һәм губерна земстволары гласные, земство мәктәбе идарәчеләре советы рәисе була. 1863–1895 нче елларда «Казанские губернские ведомости», 1872–1873 нче елларда «Камско-Волжская газета», 1884–1895 нче елларда «Волжский вестник» газеталарында әдәби тәнкыйтьче буларак язмалар бастыра. 1865–1868 һәм 1881–1885 нче елларда «Учёные записки Казанского университета» журналы мөхәррире.

Күргәзмәдә Н.Н.Буличның тормышына багышланган китаплар, иҗатын бәяләгән мәкаләләр, аның А.П.Сумароков турындагы монографиясе, М.В.Ломоносов, В.А.Жуковский, А.С.Пушкин, Ф.М.Достоевский турындагы мәкаләләр һәм чыгышлар, Казан университеты тарихы буенча (1887–1891) беренче фәнни хезмәте урын алды.

Күргәзмә Татарстан Республикасы Милли китапханәсенең төп бинасындагы Зур уку залында (Казан, Кремль ур., 33 нче йорт) 2014 нче елның 31 нче мартына кадәр эшләячәк. Рәхим итегез!