Татар әдәбияты һәм туган якны өйрәнү бүлегендә китап күргәзмәләре

Татарстан Республикасы Милли китапханәсенең татар әдәбияты һәм туган якны өйрәнү бүлеге (Казан, Кремль ур., 33 нче йорт) укучылар игътибарына актуаль темаларга караган күргәзмәләр тәкъдим итә.

Мәдәният елында «Казан – төрки дөньяның мәдәни башкаласы» дип исемләнгән китап күргәзмәсе куелу аеруча әһәмиятле. Урнаштырылган китаплар Казан шәһәренең эре мәдәни үзәк икәнлеген ачык чагылдыралар. Күргәзмәдә Татарстан башкаласы – 1000 еллык тарихы булган Казан – турында китаплар, фоторәсемнәр; борынгы Казан тарихы буенча язма чыганаклар; Кремль, мәчетләр архитектурасын өйрәнү буенча тәфсилле мәгълүмати белешмәләр куелган. Экспозиция болгар, татар һәм дөньяви ислам цивилизациясенең үзара бәйләнешләре, үзенчәлекле татар архитектура традицияләре формалашу турында сөйли.


Совет гаскәрләрен Әфганстаннан чыгаруга 25 ел тулуга багышлап «Әфган «кызалаклары» күргәзмәсе оештырылды. Бу күргәзмә илебез тарихындагы иң аянычлы вакыйгага – мәгънәсез кан коюдан торган әфган сугышына багышланган. Чит җирләрдә меңләгән совет хәрбиләре башларын салдылар. Алар арасында безнең якташларыбыз – татарстанлылар да күп. Күргәзмәдә тәкъдим ителгән китаплар әфган сугышында катнашкан ватандашларыбызның сугышчан юлын чагылдыра.