«Казан – төрки дөньяның мәдәни башкаласы»

2014 нче елда Казан шәһәре төрки дөньяның мәдәни башкаласы итеп сайланды. Шул уңайдан Татарстан Республикасы Милли китапханәсенең мәгълүмат-библиография бүлегендә 15 нче февральдән 28 нче февральгә кадәр «Казан – төрки дөньяның мәдәни башкаласы» дип аталган күргәзмә куелды. Анда Казан шәһәренең тарихы, мәдәни ядкәрләренә багышланган мәгълүмати-белешмә басмалар тәкъдим ителде.
Татарстан Республикасы Президенты Р. Миңнеханов Казан шәһәрен төрки дөнъяның 2014 елгы мәдәни башкаласы дип игълан итү белән бәйле рәвештә оештыру чаралары турында 2013 нче елның 13 нче маенда ук УП-394 номерлы Указга кул куйды. Казан шәһәрен төрки дөньяның 2014 елгы мәдәни башкаласы дип игълан итү турындагы карар Халыкара төрки мәдәният оешмасы (ТЮРКСОЙ) әгъзалары булган илләр мәдәният министрлары Даими Советының чираттагы ХХХ утырышында кабул ителгән иде.