Гәрәй Рәхимнең сайланма әсәрләрен тәкъдим итү

2014 нче елның 21 мартында Татарстан Язучылар берлеге бинасында урнашкан Тукай клубында Г.Тукай исемендәге Дәүләт премиясе лауреаты, Татарстанның халык язучысы Гәрәй Рәхимнең биш томлы сайланма әсәрләрен тәкъдим итү кичәсе узды.
Кичәдә Г.Рәхимнең үзе һәм иҗаты белән якыннан таныш булган бик күп дуслары, иҗатташлары, әдәбият сөючеләр, сәнгать әһелләре катнашты.
Кичәне Г.Рәхимнең чордашы, күренекле шагыйрь Рәдиф Гаташ алып барды. Әдәбият галиме Тәлгать Галиуллин үз чыгышында Г.Рәхим иҗатына югары бәя бирде.
Тәрҗемәче Фатих Котлы СССР вакытында төрек матбугатында шул заман татар язучылары арасыннан беренче булып Г.Рәхимнең шигырьләре басылу турында әйтеп үтте.
Клубның фойесында Татарстан Республикасы Милли китапханәсенең татар әдәбияты һәм туган якны өйрәнү бүлеге хезмәткәрләре тарафыннан Г.Рәхим иҗатына багышланган күргәзмә оештырылды. Әдипнең Милли китапханә фондларында сакланган барлык басмалары әлеге күргәзмәдә урын алды.
Китап тәкъдим итү кичәсендә катнашучыларның бик күбесе күргәзмәне кызыксынып карады, китапханәчеләр хезмәтен югары бәяләп, аларга рәхмәт сүзләрен җиткерде.