Исмәгыйль Гаспралыга багышланган он-лайн конференция

Кырымның Акмәчет шәһәрендә урнашкан, Исмәгыйль Гаспралы исемен йөртүче Республика кырымтатар китапханәсендә һәр елның 20 нче марты көнендә «Исмәгыйль Гаспралы галәме» исемле әдәби укулар уздырыла. Әлеге форум, олуг шәхеснең туган көненә туры китереп, китапханә тарафыннан үткәрелә һәм быел да, 20 нче март көнне әлеге әдәби укулар үзенең эшен дәвам итте.

Быелгы әдәби укулар элекке елларда үткәрелгәннәреннән шунысы белән аерылып тора – ул он-лайн рәвештә Татарстан Республикасы Милли китапханәсе белән берлектә оештырылды, китапханәнең төп бинасында хезмәткәрләр һәм килгән кунаклар катнашында узды. Сәламләү сүзе белән конференцияне Исмәгыйль Гаспралы исемендәге кырымтатар китапханәсенең директор урынбасары Ләйлә ханым Кадыйрова ачып җибәрде. Татарстан Милли китапханәсе директоры Наил Камбеев, укуларда катнашучыларны сәламләп, ике тугандаш халыкның китапханәләре арасында булган хезмәттәшлек тарихы турында сөйләде. Китапханәбезнең кулъязмалар һәм сирәк китаплар бүлеге мөдире Айрат Заһидуллин бүлек фондларында сакланучы ядкәрләрнең И.Гаспралыга кагылышлылары һәм кырымтатар телендәге башка китаплар хакында бәян итте.
Казан федераль университеты (КФУ) доценты Фәрит Шәкүров Исмәгыйль Гаспралының төрки-татар дөньясында тоткан урыны хакында бик мәгълүматлы доклад белән чыгыш ясады. Филология фәннәре докторы Мәсгуд ага Гайнетдинов «Тәрҗеман» газетасы, аның төрки-татар дөньясында, ХХ гасыр башы татар вакытлы матбугатында тоткан әһәмиятле ролен искә төшерде. КФУның Н.Лобачевский исемендәге Фәнни китапханәсе сирәк китаплар бүлеге мөдире Эльмира Әмирханова фондларда сакланучы кырымтатар чыганаклары хакында тәфсыйльле мәгълүмат бирде. Татарстан Республикасы Министрлар Кабинеты каршындагы Баш Архив идарәсенең сектор мөдире Ильяс Мөстәкыймов республика архивларында сакланучы кырымтатар чыганаклары белән таныштырды. Татарстан Дәүләт Советы хезмәткәре Сөләйман Рахимов Казанда сакланучы кырымтатар телендәге чыганакларның гыйльми әһәмиятен һәм үзара мәдәни-фәнни бердәмлекне ныгыту юлларын күрсәтеп узды.
Конференциядә «Бакчасарай тарихи-мәдәни тыюлыгы»ның кече фәнни хезмәткәре Сельвина Сеитмеметова яңа табылган, Исмәгыйль Гаспралы шәхси китапханәсенең тарихын яктырта торган материаллар белән таныштырды. Кырым татарларының «Хан сарае» тарих һәм мәдәният музее мөдире урынбасары Ленара Чубукчиева «Тәрҗеман» газетасы битләрендә хатын-кыз темасы турында чыгыш ясады.
Татарстан Республикасы Милли китапханәсе белән бергә әдәби укуларда шулай ук Азәрбәйҗан Җөмһүриятенең Ф.Кочарли исемендәге балалар китапханәсе дә катнашты.

Кулъязмалар һәм сирәк китаплар бүлеге, тел.: (843) 292-09-28.