Татарстан Республикасы Милли китапханәсендә Франкофония көннәре

2014 нче елның 25 нче мартында Татарстан Республикасы Милли китапханәсенең чит телләр бүлегендә (Казан шәһ., К.Маркс ур., 36 нчы йорт), француз теле, мәдәнияте белән кызыксынучыларны берләштерү максатыннан, бөтен дөньяда уздырылучы Франкофония көннәренә багышланган чираттагы очрашу булды.
Франкофония көннәре кысаларында ХIХ гасырның күренекле француз рәссамнарына багышланган «Импрессионизм: сенсация һәм иҗади күтәренкелек» дип аталган кичә үткәрелде. Импрессионистлар кояш, яктылык һәм һаваны сурәтләп, томан матурлыгын, зур шәһәрнең тынгысыз тормыш атмосферасын, төнге утлары сибелешен һәм туктаусыз хәрәкәтне чагылдырып, рәсем сәнгатенең мөмкинлекләрен арттыралар.
Очрашуга килгән Казан (Идел буе) федераль университетының ВМК, психология факультетлары һәм Массакүләм коммуникацияләр һәм социаль фәннәр институты студентлары сәнгать дөньясына чумдылар, импрессионистларның мозаика-рәсемнәрен төзүдә катнаштылар, куелган тема буенча француз телендә чыгыш ясадылар.
Очрашу актив иҗади атмосферада узды.