Республикакүләм конкурслар нәтиҗәләре

Татарстан Республикасы мәдәният министрлыгының китапханә эше өлкәсендәге «Лидер» («Әйдәп баручы») һәм «Иҗади эзләнү» премияләренә лаеклыларны ачыклаучы конкурсларга нәтиҗә ясалды.

«Лидер» премиясе лауреаты булып Бөгелмә районының «Җирлекара үзәк китапханә» муниципаль бюджет мәдәният учреждениесе танылды. Мондый мактаулы дәрәҗәгә бөгелмәлеләр китапханә хезмәте күрсәтүне яңача камилләштергәннәре, универсаль уку залы оештырганнары өчен лаек булды.
«Иҗади эзләнү» пермиясе лауреатлары:
– «Үзәк китапханә» номинациясендә:
1. Район китапханәләре тарихын өйрәнүгә караган фәнни-тикшеренү эшчәнлеге һәм «Югары Ослан китапханәчеләре» дигән биобиблиографик белешмәлек төзегәннәре өчен Югары Ослан районы Үзәк китапханәсе;
2. Каршылыкларсыз китапханә мохите тудырганнары һәм сәламәтлекләре, физик мөмкинлекләре чикләнгән кешеләргә китапханә хезмәте күрсәтүне үрнәк рәвештә оештырганнары өчен Лениногорск районы Үзәк китапханәсе.
– «Авыл китапханәсе» номинациясендә:
1. Кукмара районында яшәүче удмуртларның милли үзенчәлеген һәм мәдәни мирасын саклау һәм үстерү проблемаларын өйрәнүгә һәм анализлауга корылган актив эшчәнлекләре өчен «Кукмара муниципаль районы ҮКСы» муниципаль бюджет учреждениесенең Түбән Комар авылы китапханәсе.
– «Шәһәр китапханәсе» номинациясендә премиягә дәгъва итүчеләр булмады.

Җиңүчеләрне котлыйбыз һәм алга таба да һөнәри уңышлар телибез!