«Мәгълүмати җәмгыятьтә – китап»

2014 нче елның 28-30 нчы апрель көннәрендә Мәскәүдә китап белеме проблемаларына багышланган «Мәгълүмати җәмгыятьтә – китап» дигән XIII нчы Халыкара фәнни конференция узды.

Конференциянең оештыручылары – Фәннәр академияләренең Халыкара ассоциациясе (ФАХА) каршындагы китап нәшер итү шурасы; Россия Фәннәр академиясенең «Дөнья мәдәниятләре тарихы» Фәнни шурасы; Китап мәдәнияте тарихын һәм китапны һәрьяклап өйрәнү комиссиясе; «Наука» фәнни һәм нәшрият үзәгенең Китап мәдәниятен өйрәнү үзәге; Мәскәү дәүләт матбугат университеты.

Конференция эшендә 11 илдән вәкилләр катнашты. Татарстанны республикабыз Милли китапханәсенең кулъязмалар һәм сирәк китаплар бүлеге фәнни хезмәткәре, филология фәннәре кандидаты Зөфәр Гыйләҗев тәкъдим итте, ул «XIX гасыр ахыры – ХХ гасыр башы татар фәнни китабы» темасына чыгыш ясады.

Конференциядә китап белеме фәненең нәзари (теоретик) һәм методологик проблемалары, шулай ук китап тарихы, китап һәм укучы мөнәсәбәтләре, электрон дәвердә китап мәдәнияте кебек мәсъәләләр каралды.