«Печән базары» флэшмоб-акциясе

2014 нче елның 23 нче маенда Казан шәһәренең Иске Татар бистәсендә «Печән базары» флэшмоб-акциясе узды. Бу чара «Ялкын» журналы, Бөтендөнья татар яшьләре форумы тарафыннан икенче тапкыр үткәрелә.
Бәйрәм берничә мәйданда оештырылган иде. Беренчесе – Ярминкә мәйданы. Монда милли бизәнү әйберләре, чигеп эшләнгән калфаклар, күн аяк киемнәре, самоварлар һәм башка кулдан эшләнгән әйберләр тәкъдим ителде, аларны сатып алу мөмкинлеге дә булды.
Икенче мәйданда Уку паркы эшләп торды. Монда вакытлы матбугатка язылу мөмкинлеге тудырылды. Чара кысаларында әдипләр Р.Батулла, Ф.Мөслимова, Х.Ширмән, М.Кәбиров һ.б чыгыш ясады. Алар китап сөючеләр белән турыдан-туры аралаштылар, күпсанлы сорауларга җавап бирделәр.
Татарстан Республикасы Милли китапханәсенең татар әдәбияты һәм туган якны өйрәнү бүлеге хезмәткәрләре дә әлеге чарадан читтә калмады. Без татар телендәге, туган як тарихын яктырткан китапларны бәйрәмгә килгән киң катлау укучыларга бүләк иттек. Алар исә китапны алу өчен милли тарих, мәдәният, әдәбият темаларына караган сорауларга дөрес җавап бирергә тиешләр иде. Безне килгән кунакларның бик актив булулары, бигрәк тә 20 нче, 102 нче гимназия укучыларының викторинада бик теләп катнашулары, китап авторларын яхшы белүләре сокландырды. Төрле яшьтәге милләттәшләребезнең татар китабына, әдәбиятына битараф булмавын күреп чиксез шатландык.
Бу күңелле чарада катнашучылар, китапханәчеләр янына кат-кат килеп, үзләренең рәхмәтләрен җиткерделәр.