Россиянең милли символы: А. С. Пушкинның тууына 215 ел

Бөек рус шагыйре Александр Сергеевич Пушкин туган көнне Россиядә Рус теле көне дә билгеләп үтелә. Бу күренекле дата уңаеннан билгеләп үтелә торган Рус теле көненә Татарстан Республикасы Милли китапханәсенең мәгълүмат-библиография бүлегендә бөек шагыйрьнең тормышы һәм иҗаты турындагы мәгълүмати чыганаклардан торган күргәзмә куелды. Биредә «Пушкин энциклопедиясе», «Пушкинның меңъеллык шәҗәрәсе», А. С. Пушкин әсәрләре энциклопедиясе, А. С. Пушкин теле һәм аның канатлы сүзләре һәм гыйбарәләре сүзлекләре, библиографик күрсәткечләр, китаплар каталогы, шагыйрь иҗатына багышланган чаралар уздыру өчен методик ярдәмлекләр урын алды.