Беренче бөтендөнья сугышы башлануның 100 еллыгына

Беренче бөтендөнья сугышы башлануга 100 ел тулу уңае белән Татарстан Республикасы Милли китапханәсенең кулъязмалар һәм сирәк китаплар бүлеге хезмәткәрләре тарафыннан «Кичке шәфәкъ нурларын кызартты канкоешлы сугыш афәте...» исемле күргәзмә оештырылды.
Беренче бөтендөнья сугышы (1914 нче елның 28 июленнән 1918 елның 11 нче ноябренә кадәр) – кешелек тарихындагы иң эре кораллы низагларның берсе. Күргәзмә шул вакыйгаларга багышланган әсәрләр белән таныштыра. Биредә рус һәм чит илләр язучыларының, газета-журналлар хәбәрчеләренең, сугыш шаһитларының китаплары, мәкалә-язмалары, фәнни һәм публицистик хезмәтләр, хәрби хәрәкәтләрнең сызымлы-рәсемле тасвирламалары, дәүләтләрнең сугыш белән бәйле рәсми документлары урын алган.
Китапханәгә килүче һәрбер кеше күргәзмә белән Татарстан Республикасы Милли китапханәсенең төп бинасындагы Зур уку залында (Казан, Кремль ур., 33 нче йорт) 2014 нче елның 15 нче августына кадәр таныша алачак.