Бөек галимебез рухын яд итеп...

Татарстан Республикасы мәдәният министрлыгы һәм Татарстан Республикасы Милли китапханәсе 2014 нче елның 18 нче июлендә Милли китапханәнең төп бинасында (Казан, Кремль ур., 33 нче йорт) Дүртенче мемориаль Ә.Г.Кәримуллин укулары уздырдылар. Укулар мәшһүр фән һәм мәдәният эшлеклесе, Татарстан Республикасы Фәннәр академиясе академигы, филология фәннәре докторы, китапчы галим Әбрар Гыйбадулла улы Каримуллин истәлегенә багышланды.

Катнашучыларга сәламләү сүзе белән Татарстан Милли китапханәсе директоры Н.Ә.Камбеев, Татарстан Республикасы Дәүләт советының Мәдәният, фән мәгариф һәм милли мәсьәләләр комитеты рәисе, ТР Милли китапханәсенең Химаячеләр шурасы рәисе Р.И.Вәлиев, Татарстан Язучылар берлеге рәисе Р.Х.Корбанов мөрәҗәгать иттеләр.
Дүртенче мемориаль Ә.Г.Кәримуллин укуларында милли китапчылык эшенә бәйле тарихи һәм хәзерге заман проблемалары турында чыгышлар яңгырады. Якын чит илләрдән килгән катнашучыларның докладлары аеруча зур игътибар белән тыңланды. «Белорус һәм чит ил коллекцияләрендә Беларусь татарларының кулъязмалары» дип аталган доклад белән Беларусь Милли фәннәр академиясенең Якуб Колас имемендәге Үзәк фәнни китапханәсе сирәк китаплар һәм кулъязмалар бүлегенең китапчылык секторы мөдире, тарих фәннәр кандидаты Елена Иосифовна Титовец, «Литва татарларының вакытлы матбугаты» дигән доклады белән Галина Антоновна Мишкинене чыгыш ясадылар.
Укуларда шулай ук Татарстанның һәм Казанның эре фәнни оешмаларыннан, югары уку йортларыннан галимнәр, Әбрар аганы белгән, аның белән аралашкан язучылар, журналистлар, мәдәният һәм мәгариф хезмәткәрләре, якташлары, фикердәшләре, шәкертләре катнашты. Аларның күбесе кызыклы һәм фәнни җәһәттән әһәмиятле докладлар, чыгышлар ясады, истәлек-хатирәләре белән уртаклашты.

Галимнең истәлеген мәңгеләштерү юнәлешендә яңа теләк-тәкъдимнәр әйтелде. Мондый фәнни-гамәли чаралар үткәрүне киләчәктә дә дәвам итү, Ә.Г.Кәримуллин хезмәтләрен яңадан бастыру зарурлыгына басым ясалды.