Фәнни казанышларга ирешкән хезмәттәшебез

Татарстан Республикасы Милли китапханәсенең редакция-нәшрият бүлеге хезмәткәре, археограф-галим, гарәби язмалар белгече, филология фәннәре кандидаты Раиф Фәтхелбәян улы Мәрданов үзенең 50 яшьлек юбилеен билгеләп үтте.

 Шул уңайдан аның 25 еллык гыйльми хезмәте нәтиҗәләрен туплаган библиографик күрсәткеч дөнья күрде. 152 биттән торган әлеге басма түбәндәге төп бүлекләрне үз эченә ала: Р.Мәрдановның китаплары; Төзүчелек эшчәнлеге; Мөхәррирлек эшчәнлеге; Мәкаләләре; Әңгәмәләре; Р.Мәрданов иҗат иткән гарәп каллиграфиясе үрнәкләре; Галимнең тормышы һәм эшчәнлеге турында; Раиф Мәрдановның фәнни һәм иҗади эшчәнлегенә бәйле кайбер мәкаләләрдән өзекләр. Тагын алты бүлекчә – Систематик күрсәткеч; Серияле басмалар күрсәткече; Нәшриятлар күрсәткече; Газета-журналлар күрсәткече; Исемнәр күрсәткече; Географик атамалар күрсәткече – библиографик белешмәлектән файдалануны бик җиңел һәм уңайлы итә. Бик күпләр өчен файдалы һәм кирәкле мәгълүматлар җентекләп һәм зур төгәллек белән теркәлгән басманы Раиф Мәрдановның «Егерме биш еллык нәтиҗә» дигән үз мәкаләсе йомгаклый.

Редакция-нәшрият бүлеге, тел. (843) 264-28-76.