«Татар археографиясе»нең чираттагы китабы

Татарстан Республикасы Милли китапханәсе нәшер итә торган «Татар археографиясе» сериясеннән археограф, текстолог Раиф Мәрдановның «Без плиндә ятамыз читлектәге кош кебек...» дип аталган чираттагы 13 нче китабы дөнья күрде. Китапта татар солдаты Мифтахетдин Галимов дәфтәрендә язылган бәетләр нәшер ителә.

Беренче бөтендөнья сугышы турындагы бәетләрнең дистәләгән вариантлары бар һәм аларның төрле җыентыкларда, вакытлы матбугат битләрендә басылып чыккан текстлары шактый. Ләкин бу китапта тәкъдим ителгән «Сугыш әхваленнән», «Ятимнәр бәете», «Плиннәрнең бәете» һәм «Сугыш бәете» текстларының моңарчы чыкканы юк иде.

Кереш мәкаләдә әлеге сугышка багышланган бәетләрнең 1914-1917 елларда ук аерым китаплар булып чыкканнарына һәм аннан соңгы чорда нәшер ителгәннәренә, кулъязма хәлендә саклана торганнарына гомуми күзәтү ясала. Шунда ук әсирлек темасына язылган мәкаләләр турында мәгълүмат бирелә.
Бу китап, иң беренче чиратта, татар әдәбияты һәм фольклоры белгечләренә, шулай ук киң катлам укучыларга да кызыклы һәм файдалы булыр.

Редакция-нәшрият бүлеге, тел. (843) 264-28-76.