Төрки телле журнал мөхәррирләре – Казанда

Башкалабыз Казанда төрки телле әдәби журналлар җыены узды. Әлеге форумга дөньяның 14 иленнән һәм Россия төбәкләреннән төрки әдәби журналлар җитәкчеләре – барлыгы 29 кунак җыелды.
«Татмедиа» матбугат һәм гаммәви коммуникацияләр агентлыгы тарафыннан ТӨРЕКСОЙ Халыкара мәдәният оешмасы белән берлектә уздырылучы әдәби җыен тантаналы төстә Татарстан Республикасы Милли китапханәсендә ачылды. Биредәге беренче утырышта ТӨРЕКСОЙ оешмасы, Татарстан Язучылар берлеге һәм Евразия Язучылар берлеге вәкилләре катнашты.
Әлеге форум кысаларында Милли китапханәнең Зур уку залында (Казан, Кремль ур., 33 нче йорт) «Төрки-татар әдәби журналлары тарихыннан (ХХ гасырдан ХХI гасырга...)» дип аталган бик кызыклы күргәзмә ачылды. Монда китапханәнең кулъязмалар һәм сирәк китаплар, вакытлы матбугат бүлекләрендә сакланучы төрки-татар телләрендәге әдәби журналлар тарихи эзлеклелектә тәгъдим ителә. Күргәзмә киштәләрендә татар, үзбәк, башкорт, азәрбәйҗан, кырымтатар, казакъ һ.б. телләрдәге басмалар урын алды. Алар белән 15 сентябрьгә кадәр танышырга мөмкин.
Кызыксынучылар, рәхим итегез!