Сара Садыйкова музеена – 10 ел

Татарстан Республикасы Милли китапханәсенең мәгълүмат-библиография бүлеге хезмәткәрләре Казан шәһәренең Киров районында урнашкан 4 нче татар гимназиясендә узган мәдәни чарада катнаштылар. Бу чара әлеге гимназиядә Сара Садыйкова музее ачылуга 10 ел тулуга багышланган иде. Биредә музей 2004 нче елдан алып эшли. Бик бай эчтәлекле, күренекле композиторның тормышы һәм иҗатына кагылышлы күп экспонатларны туплаган. Музейның күрке булып Сара Садыйкованың шәхси инструменты – пианиносы тора. Әлеге чарада күп кенә мәдәният һәм сәнгать әһелләре, композиторның иҗатын хөрмәт итүчеләр катнашты. Шагыйрьләр Роберт Миңнуллин, Ренат Харис, Эльмира Шәрифуллина; җырчылар Миңгол Галиев, Зөлфия Зарипова; Г. Камал исемендәге Татар Дәүләт Академия театры артисты Ирек Баһманов, театрның музыкаль бүлеге җитәкчесе, дирижеры Фуат Әбүбәкеров; музыкантлар Марат Әхмәтов, Маргарита Коварская, Әхмәт Кәримов, Кирам Сатиев, Илдар Арсланов; скульптор Изабелла Рогожина, Н. Җиһанов исемендәге Казан дәүләт консерваториясе студентлары композиторның әсәрләрен башкардылар, истәлекләре белән уртаклаштылар. Гимназия укучылары Сара Садыйковага багышланган шигырьләр укыдылар. Кичәнең күрке – Сара Садыйкова һәм режиссер, артист Газиз Айдарскийның кызы, үзе дз күренекле сәнгать йолдызы – балет биючесе Әлфия Айдарская иде. Ул музей оештыруда зур көч куйган. Әлфия ханым үзенең истәлекләрен сөйләде, әнисенең композитор һәм җырчы булуыннан тыш, шигырьләр дә язуын әйтте һәм Сара Садыйкованың Казан турындагы шигырен укыды.