Әдәби-театраль кичә

2015 нче елның 26 нчы февралендә Татарстан Республикасы Милли китапханәсенең Зур уку залы «Театр кунакханәсе» тамашачыларын кабул итте. Бу очрашуда Кәрим Тинчурин исемендәге Татар дәүләт драма һәм комедия театры артистлары белән бергә «Заманча Шекспир» дип исемләнгән әдәби-театраль кичә үткәрелде.

Кичәдә Россиянең атказанган сәнгать эшлеклесе, танылган театр белгече, Казан дәүләт мәдәният һәм сәнгать университеты профессоры Ильтани Илялова, Татарстанның атказанган артисты, Кәрим Тинчурин исемендәге Татар дәүләт драма һәм комедия театрының әдәби бүлек мөдире Шамил Фәрхетдинов «Гамлет. Күренешләр» спектакленең куелу тарихы турында сөйләделәр. Театрның талантлы яшь артистлары Артем Пискунов, Резеда Сәләхова, Булат Зиннәтуллин, Илфак Хафизов, Татарстанның атказанган артисткасы Г.Нәүмәтова, Зөлфәт Закиров спектакльдә үзләре уйнаган образлар турында мавыктыргыч итеп чыгыш ясадылар. Кичә ахырында исә Гамлетның танылган монологы яңгырады. Тамашачылар артистларны көчле алкышлар белән озатып калды. Кичә бик җылы һәм җанлы рухта узды.