Киң колачлы тырыш әдип

2015 нче елның 5 нче мартында Татарстан Республикасы Милли китапханәсенең Зур уку залында «Дәрья» әдәби кунакханәсе Татарстанның халык язучысы, Г.Тукай исемендәге Дәүләт премиясе лауреаты, драматург, публицист, режиссер, җәмәгать эшлеклесе, киносценарийлар авторы Рабит ага Батулла белән очрашу кичәсе үткәрде. Рабит Батулла - әдәбиятның төрле жанрларында иҗат итүче әдип. Ул драматург буларак кына түгел, ә прозаик, балалар язучысы буларак та танылды. Аның «Cөембикә»,«Күк капусы ачылганда», «Җимерелгән бәхет» һәм башка зур күләмдәге әсәрләре татар әдәбиятында зур урын алды.Киң җәмәгатьчелек аны татар халкының мәшһүр шәхесләре турындагы тарихи-әдәби документаль очерклар һәм Коръән тәфсиренә кагылышлы хезмәтләр авторы буларак та белә.

Рабит Батуллага 1985 елда «Татарстанның атказанган сәнгать эшлеклесе» дигән мактаулы исем бирелә. Әдәбият өлкәсендә ирешкән уңышлары һәм иҗтимагый эшчәнлеге өчен ул Гаяз Исхакый исемендәге һәм Татарстан Республикасының Габдулла Тукай исемендәге премияләренә лаек булды.

КичәнеТатарстан Дәүләт Советының мәгариф, фән, мәдәният һәм милли мәсьәләләр комитеты рәисе Разил Вәлиев Рабит Батулланың иҗаты турындагы бик эчтәлекле чыгышы белән башлап җибәрде. Татарстан Язучылар берлеге рәисе Рафис Корбан Рабит Батулланың әдәбият мәйданында киң колачлы тырыш иҗатчы икәнлегенә басым ясады.Татарстан Милли китапханәсенең фәнни эшләр буенча директор урынбасары Ирек Һадиев язучының «Милли китап» нәшриятында дөнья күргән басмалары белән тамашачыларны таныштырып үтте. Рабит абый Батулла үзенең тормышыннан төрле кызыклы вакыйгалар сөйләде, тамашачылар белән аралашты, аларның сорауларына бик тапкыр җаваплар бирде, китапларын бүләк итте.Кичә ахырында исә ул үзе алып килгән татар халык музыка уен коралларында матур көйләр яңгыратты. Әдәби кичә бик җанлы рухта узды һәм килгән тамашачылар күңелендә якты тәэсирләр калдырды.