Хәтер бәйрәме

Бөек Җиңүнең 70 еллыгы уңаеннан 2015 елның 6 нчы маенда Татарстан язучылары берлегендә фронтовик-язучыларның гаиләләре белән очрашу булды. Әлеге чарада эзтабар-язучы Самат Шакир кызы, ТР Милли китапханәсенең мәгълүмат-библиография бүлеге хезмәткәре Зөбәрҗәт Самат кызы Нуриева да катнашты.
Сугыш чоры авырлыклары турында ветераннар арасында бердәнбер исән калган язучы Фәйзи Йосыф улы Галиевның чыгышы зур дулкынлану белән кабул ителде.
Мирсәй Әмирнең, Габдрахман Әпсәләмовның, Габдулла Алишның, Нури Арслановның, Салих Батталның, Афзал Шамовның, Шәйхи Маннурның, Әхмәт Исхакның, Нәби Дәүлинең һәм башка танылган язучыларның балалары үзләренең хатирәләре белән уртаклаштылар.
Кичәдә танылган язучылар Роберт Миңнуллин, Гәрәй Рәхим, Камил Кәримов, Шаһинур Мостафин, Флера Тарханова, Касыйм Тәхау, Рәфкать Кәрами, Госман Гомәр һәм массакүләм мәгълүмат чаралары вәкилләре дә катнашты.
Татарстанның халык артисткасы Резедә Галимова һәм Татарстанның атказанган артисты Айдар Габдинов башкаруындагы җырлар бәйрәмне ямьләндереп җибәрделәр.
Кичә бик җылы, эчкерсез шартларда узды.