Бөтендөнья укытучылар көне

Ел саен 5 нче октябрьдә Бөтендөнья укытучылар көне бәйрәм ителә. Бу – барлык укытучы һәм мөгаллимнәрнең, мәгариф өлкәсе хезмәткәрләренең һөнәри бәйрәме, аларның хезмәтен, сыйфатлы белем бирүләрен, шулай ук җәмгыять үсешенә кыйммәтле өлеш кертүләрен бәяләп үтә торган көн.

Шушы уңайдан Татарстан Республикасы Милли китапханәсенең күргәзмәләр һәм мәдәни программалар бүлегендә (Кремль ур., 33 нче йорт) «Укытучы, синең исемең алдында...» дип исемләнгән китап күргәзмәсе ачылды.

Күргәзмәдә педагогика тарихы, методик кулланмалар һәм укытучының авыр хезмәтен, аларга карата лаеклы хөрмәт һәм илтифатны чагылдырган матур әдәбият урын тапты.

Күргәзмә киң җәмәгатьчелеккә тәгаенләнгән. Ул октябрь азагына кадәр дәвам итәчәк. Рәхим итегез!