Социалистик көнкүреш музеена экскурсия

2011 нче елның 4 нче октябрендә Татарстан Республикасы Милли китапханәсе хезмәткәрләре Социалистик көнкүреш музеена сәяхәт кылдылар.
Күптән түгел Казанда ачылган Социалистик көнкүреш музее төрле музейлар, күргәзмә заллары, сәнгать галереялары һәм башка мәдәни оешмалар арасында үзенчәлекле урын алып тора. Безнең тормышыбыздан бик ашыгып китеп баручы үткәнебезне тотып калырга, күңелебездә беркетергә теләгән бер төркем энтузиастлар көче белән оештырылган бу музейга килгән кунакларны «Позитив хисләр дөньясына рәхим итегез!» дигән сүзләр каршы ала.
Коллекциядәге экспонатларны игътибар белән карап, уенчыкларда, комсомол күкрәк билгеләрендә, пионер галстукларында, мәктәп дәреслекләрендә, грампластинкаларда, пыяла сөт-кефир шешәләрендә һәм башка әйберләрдә китапханәчеләр күтәренке рух һәм куаныч белән үзләре өчен бик якын, кадерле булган балачак һәм яшьлек атрибутларын таныдылар.
Музейда дустанә атмосфера урнашуга музей директоры, үз эшенә ихлас гашыйк Рөстәм Вәлиәхмәтовның музей оешу тарихы, экспонатлар турында мавыктыргыч сөйләве дә ярдәм итте. Очрашу акрынлап уртак истәлекләр, хатирәләр белән берләшкән, бер-берсен аңлаучы кешеләр диалогына әйләнде.
Музейга килгән казанлылар һәм башкала кунакларының фикерләр һәм тәкъдимнәр китабында калдырган язмаларыннан күренгәнчә, музей өлкән яшьтәге кешеләр өчен генә түгел, яшьләр өчен дә кызыклы. Алар монда әти-әниләре, әби-бабайларының үзләре өчен бик аз билгеле дөньясы белән танышалар.
Музейга килү Татарстан Республикасы Милли китапханәсе хезмәткәрләре күңелендә үткәнне җиңелчә сагыну хисен яңартты һәм бирегә дуслар, туганнар һәм балалар белән яңадан килү теләген тудырды.