«Татар халкының моң чишмәсе»

Халкыбызның милли хәзинәләрен саклау, аларны киң җәмәгатьчелеккә танытуда өлешебезне кертү максатыннан, ТР Милли китапханәсенең Зур уку залында (Кремль ур., 33) «Татар халкының моң чишмәсе» дип аталган күргәзмә оештырылды.

Татар халкы – гасырлар буе нинди генә сынауларга дучар булса да, барлык авырлыкларны җиңеп, телен, милләтен, гореф-гадәтләрен, җыр, бәет, мөнәҗәтләрен саклап килгән халык. Фольклор әсәрләрендә халыкның иҗтимагый-сәяси тормышы, азатлыкка омтылуы, дини карашлары һәм шәхси кичерешләре чагылыш тапкан. Китапханәбезнең кулъязмалар һәм сирәк китаплар бүлегендә җырлар, бәетләр, мөнәҗәтләр язылган кулъязмалар бик күп булуы – табигый күренеш.

Күргәзмәдә, ХIХ гасыр ахыры – ХХ гасыр башы кулъязмалары һәм басма китаплары белән бергә, хәзерге көндә дөнья күргән басмалар да урын алды.

Күргәзмә 2012 нче елның 15 нче гыйнварына кадәр эшләячәк. Килегез, күрегез, мәгълүмат алыгыз!