Ференц Листның тууына 200 ел

2011 нче елның 22 нче октябрендә венгр композиторы, пианист һәм дирижер Ференц Листның (1811-1886) тууына 200 ел тула. 19 нчы октябрьдән Татарстан Республикасы Милли китапханәсенең сәнгать бүлегендә әлеге күренекле датага багышланган күргәзмә эшли.
Ференц Листның иҗаты бертөрле генә түгел: зәвыксызлык чигенә барып җиткән тотрыксыз-эзлексез юнәлеш күтәренке күзаллаулар, көчле омтылышлар һәм якты хисләр ташкыны белән үрелә. «Христос», «Изге Елизавета турында риваять», «Реквием», «Венгрларның тәхеткә утырту гыйбадәте» һ.б. бик күп әсәрләре аның исемен бөтен дөньяга танытты. Ференц Лист кебек күп бүләкләргә һәм дәрәҗәле исемнәргә лаек булган бер генә музыкант та юк.
Күргәзмәгә куелган китаплар, альбомнар, ноталы басмалар, аудио язмалар белән танышып, композиторның тормыш һәм иҗат юлы турында күп мәгълүмат алырга мөмкин.
Сәнгать бүлегенә (Театр ур., 5 нче йорт) рәхим итегез! Сезнең белән очрашуга без шат булачакбыз!