Күчмә иҗади лаборатория

2011 нче елның 27 нче октябрендә Татарстан Республикасы Милли китапханәсе Аксубай районы Үзәк китапханәсе базасында Татарстан Республикасы муниципаль китапханәләренең өлкәннәр белән эшләү тәҗрибәсен уртаклашуны максат иткән күчмә иҗади лаборатория-семинар үткәрде.

Семинарда республиканың тугыз районыннан килгән үзәкләштерелгән китапханәләр системалары (ҮКС) директорлары, китапханәче-методистлар, бүлек мөдирләре, Милли китапханә җитәкчеләре һәм хезмәткәрләре катнашты.

Катнашучыларны Аксубай муниципаль районы хакимияте башлыгы Камил Камал улы Гыйльманов һәм Татарстан Республикасы Милли китапханәсенең фәнни эшләр буенча директор урынбасары Ирек Габделхәй улы Һадиев сәламләде.

Муниципаль бюджеттагы «Аксубай авылара үзәк китапханәсе» мәдәният учреждениесе (МБМУ) директоры Ирина Анатольевна Телешева Аксубай үзәкләштерелгән китапханәләр системасының яңача эшчәнлеге турында җентекләп сөйләде.

«Өлкәннәргә китапханә-мәгълүмат һәм мәдәният хезмәте күрсәтү» темасына «Аксубай авылара үзәк китапханәсе» МБМУнең укучыларга хезмәт күрсәтү бүлеге мөдире Фәймә Гариф кызы Гатина; «Зәй муниципаль районында китапханәләрнең өлкән кешеләр белән эшләү тәҗрибәсе» темасына Зәй муниципаль районы «ҮКС» МБМУ директоры Роза Михайловна Вәлиева; «Өлкән яшьтәге кешеләрнең ялын оештыруда традицион эш алымнарын файдалану» темасына Нурлат районының «Җирлекара Үзәк китапханә» муниципаль бюджет оешмасы директоры Роза Харис кызы Липатова; «Буыннар һәм вакыт бәйләнеше: Казан шәһәре китапханәләрендә өлкән яшьтәге кешеләр белән эшләү тәҗрибәсе» темасына «Казан шәһәренең үзәкләштерелгән китапханәләр системасы» муниципаль мәдәният учреждениесе директоры Резеда Наил кызы Исмәгыйлева чыгышлары тыңланды.

Семинарда катнашучылар районның Түбән Баланда һәм Иске Кармәт авылы китапханәләре эше белән урыннарга барып таныштылар, шулай ук Аксубай районының туган якны өйрәнү музеенда һәм Иске Кармәт авылындагы Хәсән Туфан музеенда булдылар.