«Алдан күрүче фикер иясе»

Татарстан Республикасы Милли китапханәсенең күргәзмәләр һәм мәдәни программалар бүлегендә (Кремль ур., 33 нче йорт), бөек рус язучысы, фикер иясе, кеше күңелен бөтен нечкәлекләре белән сурәтләү остасы
Ф.М.Достоевскийның (1821–1881) тууына 190 ел тулу уңаеннан, «Алдан күрүче фикер иясе» дип исемләнгән китап күргәзмәсе ачылды.
Күргәзмәдә Федор Михайловичның аерым, сайланма һәм күптомлы әсәрләре, аның тормышы һәм иҗаты турындагы китаплар, альбомнар, мемуарлар һәм энциклопедик басмалар урын алды.
Шәхес һәм язучы буларак дөньякүләм танылган Ф.М.Достоевский хакындагы экспозиция белән танышкач, һәркем аның иҗаты белән бәйле тәэсирләрен яңартыр дип ышанабыз. Киләчәккә өмет белән карарга ярдәм итүче гаҗәеп язучы Достоевскийның безгә – XXI гасыр халкына – замандаш булып кала алуы – бәхәссез факт.
Күргәзмә ноябрь азагына кадәр дәвам итәчәк.