Патент һәм инновацияле икътисад

2011 нче елның ноябрь аенда Татарстан Республикасы Милли китапханәсенең патентлар бүлегендә (Карл Маркс ур., 36 нчы йорт) «Патент һәм инновацияле икътисад» дип аталган күргәзмә эшли.
Хәзерге җәмгыять тормышы инновацияләргә һәм инновацияле идарә итүгә югары игътибар бирүне сорый. Инновацияле икътисад – ул белемгә, инновацияләргә, яңа фикерләргә, яңа машиналарны, системаларны, технологияләрне теләп кабул итүгә һәм аларны эшчәнлекнең төрле өлкәләрендә практик куллануга әзер булуны үзенә нигез итеп алган икътисад. Фәнни-техник тәрәкъкыятьнең нәтиҗәләре булып яңа физик, химик, биологик принципларга нигезләнгән фәнни казанышлар – яңа белемнәр, яңа фәнни-техник фикерләр, ачышлар һәм уйлап табулар, яңа технологияләр тора. Шуңа да дәүләтнең, җитештерү тармагының яки аерым бер оешманың инновацияле үсеш юлы яңа уйлап табуларсыз мөмкин түгел.
Күргәзмәдә фәнни-техник үсешнең өстенлекле юнәлешләренә һәм перспективалы уйлап табуларга караган китаплар, нанотехнологияләр өлкәсендә ачышларны рәсмиләштерү һәм аларга экспертиза уздыру өчен гаризалар бирү буенча күрсәтмәләр, технологияләрне лицензияле килешүләр төзеп тапшыру, инновацияле икътисад өлкәсендә инвестицияләр белән идарә итү буенча әдәбият тәкъдим ителә. Шулай ук лицензияле эшчәнлек, интеллектуаль милек объектларына маркетинг тикшерүе үткәрү мәсьәләләре каралган басмалар да урын алган. Күргәзмә икътисад белгечләре, менеджерлар, патент белгечләре, эшкуарлар һәм шулай ук укытучылар, фәнни хезмәткәрләр, аспирантлар һәм студентлар өчен тәкъдим ителә.