Лионель Дюруа белән очрашу.

2011 нче елның 5 нче декабрендә ТР Милли китапханәсендә танылган француз язучысы Лионель Дюруа белән очрашу булды.

Лионель Дюруа – сәләтле шәхес, аның эшчәнлеге күпкырлы. Журналистикада шактый гына нәтиҗәле эшләгәннән соң, акрынлап әдәбият өлкәсенә кереп китә һәм үзен шуңа тулаем багышлый.

Дюруа – 10 роман авторы, шуларның кайберләре экранлаштырылган. Аның кешеләр күңелен оста итеп ачкан туры сүзле әсәрләре иҗатын серле һәм кызыклы итә.

ТР Милли китапханәсенең кунакчыл залында узган әлеге чарада катнашучыларга хәзерге заманның иң үзенчәлекле язучыларыннан берсе булган Лионель Дюруа белән якыннан танышу һәм әңгәмәләшү бәхете елмайды.