Татарстан Республикасы Милли китапханәсе Халыкара фәнни-гамәли конференциядә катнашты

Татарстан Республикасы Милли китапханәсе хезмәткәрләре 2012 нче елның 28-29 нчы февраль көннәрендә Казанда узган «Тормыш иминлегенең заманча проблемалары: теория һәм практика» дигән II нче Халыкара фәнни-гамәли конференциясе эшчәнлегендә катнаштылар.
Конференцияне министрлыклар, ведомстволар һәм оешмалар катнашлыгында Татарстан Республикасы Министрлар Кабинеты уздырды. Аның максаты – кеше тормыш эшчәнлегенең иминлеген тәэмин итү өлкәсендә халыкара хезмәттәшлекне киңәйтү. Анда Россия, Франция, Германия, Израиль, Италия, Финляндия, Польша һәм башка илләр министрлыкларыннан, ведомстволарыннан һәм фәнни оешмаларыннан җитәкчеләр, әйдәп баручы белгечләр һәм экспертлар катнашты.
28 нче февральдә шәһәрнең төрле фәнни һәм методик үзәкләрендә тормыш иминлеге өлкәсендә Россиядәге һәм чит илләрдәге әйдәп баручы белгечләр катнашында секция утырышлары узды.
29 нчы февральдә «Корстон» сәүдә-күңел ачу үзәгендә күргәзмә ачылды, анда 30дан артык үз илебез һәм чит ил җитештерүчеләре үзләренең тормыш иминлеге, медицина, юл хәрәкәте куркынычсызлыгы өлкәсендәге фәнни тикшеренүләрен һәм серияләп җитештерелә торган эшләнмәләрен тәкъдим иттеләр. Күргәзмәне тантаналы рәвештә Татарстан Республикасы Премьер-министры Илдар Халиков ачты. Россиянең эчке эшләр министры Рәшит Нургалиев та күргәзмә белән танышты.
Конференция эшчәнлегендә ТР Милли китапханәсе дә актив катнашты. «Корстон» сәүдә-күңел ачу үзәгендә Милли китапханә хезмәткәрләре көче белән «Тормыш-эшчәнлек иминлеге» дип исемләнгән күргәзмә куелды. Анда фәнни-гамәли конференция темасына кагылышлы китаплар урнаштырылды, алар катнашучыларда зур кызыксыну уяттылар.