Талантның тамыры тирән...

2012 нче елның 12 нче мартында татар әдәбияты классигы Галимҗан Ибраһимовның тууына 125 ел тула.

 Галимҗан Ибраһимов – XX гасыр татар дөньясында аеруча зур урын тоткан шәхес, кабатланмас талант иясе: олуг язучы, танылган энциклопедист-галим, күренекле дәүләт һәм җәмәгать эшлеклесе. Аның әдәби һәм рухи мирасын туплау, бастырып чыгару буенча бик зур эшләр башкарылган. Хезмәтләре нәшриятларда төрле телләрдә меңнәрчә тиражлар белән басылып чыкты, роман һәм повестьлары кабат-кабат дөнья күрде, драма әсәрләре сәхнәләштерелеп театрларда куелды. Язучының күпкырлы иҗаты галимнәр тарафыннан тикшерелеп, шактый гына кандидатлык һәм докторлык диссертацияләре якланды. Галимҗан Ибраһимовның бай һәм катлаулы тормыш юлы татар язучыларының иҗатларында да гәүдәләнеш тапты. Язучының әдәби мирасын хәзерге буын укучыларына җиткерүдә XX гасырның 1974-1986 елларында нәшер ителгән 8 томлык басмасы зур роль уйнады. Гомумән, Г.Ибраһимовның әдәби мирасы рухи тормышның бик күп өлкәләренә карый. Аның образы, мирасы вакытлар үтү белән тоныкланмый, киресенчә, яңа кырлары белән ачыла гына бара. Бу мирас милләтнең XXI гасырдагы рухи тормышында да үзенең әһәмиятен югалтмас.

Татарстан Республикасы Милли китапханәсендә (Казан шәһәре, Кремль урамы, 33 нче йорт, 2 нче кат), Галимҗан Ибраһимовның олуг юбилеена багышлап, «Талантның тамыры тирән» дип аталган күргәзмә эшли башлады. Г.Ибраһимовның шәхесе һәм иҗаты белән кызыксыну беркайчан да кимеми, шуңа күрә күргәзмәнең төп максаты – мөмкин кадәр күбрәк мәгълүмат бирү. Күргәзмәгә Милли китапханә фондларында булган һәртөрле басмалар куелган. Болар – Г.Ибраһимовның үзен һәм үз чорын чагылдырып иҗат иткән әсәрләре (проза, гыйльми язмалар, хатлар...). Шулай ук әдипнең 1928–1939 нчы еллар арасында латин графикасында чыккан басмалары да урын алды, әлеге чорга кадәр гарәп шрифтында басылган, хәзерге вакытта китапханәнең кулъязмалар һәм сирәк китаплар бүлеге фондларында сакланучы китапларының тышлыкларыннан күчермәләр дә тәкъдим ителде. Шунда ук әдип әсәрләренең рус телендәге тәрҗемәләре белән дә таныша аласыз. Язучының иҗаты һәм тормыш юлы турындагы хезмәтләр дә файдалы булачак.

Татарстан Республикасы Милли китапханәсенең татар әдәбияты һәм туган якны өйрәнү бүлеге хезмәткәрләре әзерләгән әлеге күргәзмә татар әдәбиятын яратучыларны һәм аның тарихы белән кызыксынучыларны битараф калдырмас.

Рәхим итегез!