Үзең тудырган матурлык

Татарстан Республикасы Милли китапханәсенең сәнгать бүлеге барлык хатын-кызларны Яз бәйрәме – 8 нче март белән котлый һәм махсус алар өчен «Үзең тудырган матурлык» дип исемләнгән күргәзмә тәкъдим итә.
Кул эше – билгеле бер кысаларга сыймый торган киң төшенчә. Бу – сәнгать әсәре дә, шул ук вакытта онытылган кәсеп тә... «Өч кыз тәрәз төбендә кичен җеп эрләгәндә...» А.С.Пушкинның ХIХ нчы гасырда ук иҗат иткән әлеге юлларын кем генә белми икән? Гасырлар уза, ә кул эше яши, югалмый, киресенчә, зур үсеш ала, аның яңа төрләре барлыкка килә. Хыялларыгызны тормышка ашырасыгыз килсә, тәҗрибә уздырудан курыкмасагыз, Сез үз кулларыгыз белән барысын да ясый аласыз. Ышаныгыз – Сезнең оста кулларыгызга хатын-кызлар көнләшеп, ир-атлар сокланып караячаклар.
Өч бүлектән торган күргәзмәбезгә куелган китаплар, журналлар һәм альбомнар белән танышып, Сез тәэсирләр, иҗади дәрт алачаксыз.
1) «Чәчәкле сәнгать» бүлеге чын чәчәкләрдән бәйләмнәр ясау һәм тукымаларда, кәгазьдә, пыялада һ.б материалларда букетлар ясау сәнгате турында;
2) «Сүстән алып тукымага кадәр» – бу – энә, җеп һәм, әлбәттә, Сезнең оста кулларыгыз ярдәмендә туган кечкенә дөнья;
3) «Уеп-сырлап ясалган бизәкләр гүзәллеге» – кул эшенең ир-атлар тәгаенләнгән төре турында.
Үзегезне бар нәрсәдә дә сынап карагыз, үз кулың белән ясалган әйберләр нәкъ менә Сезнеке булуы белән бәһасез һәм кадерле.
Күргәзмә китапханә хезмәткәрләренең оста куллары белән ясалган эшләнмәләр урнаштырылуы белән кызыклы.
Сәнгать бүлегенә (Театр ур., 5 нче йорт) рәхим итегез!