Халыклар дуслыгы – диннәр татулыгы

Татарстан Республикасы Милли китапханәсе хезмәткәрләре 2012 нче елның 22-24 нче март көннәрендә Казанда «Дружба народов» журналы тарафыннан БДБ илләре гуманитар хезмәттәшлеге Дәүләтара фонды теләктәшлеге белән үткәрелгән үзенчәлекле иҗтимагый акциядә катнаштылар.

Әлеге фестивальне уздыру урыны итеп Казан шәһәренең сайлануы һич тә очраклы түгел. Республикабыз башкаласы толерантлык һәм мәдәни диалог, чит мәдәнияткә карата ихтирам күрсәтү һәм этник, мәдәни үзенчәлекләрне тану мәсьәләләрендәге катлаулы тигезлекне саклауның үрнәге булып тора.

22 март көнне Татарстан Республикасы Милли китапханәсенең Зур уку залы (Казан, Кремль ур., 33 нче йорт) милләтара һәм динара мөнәсәбәтләрнең көнүзәк проблемаларын тикшерүгә кую, заманыбызның катлаулы сорауларына җавап эзләү, БДБ һәм Балтыйк буе илләре язучыларын үзара якынайту мәйданчыгына әверелде.

Чакырылган кунаклар һәм очрашуда катнашучылар – профессиональ язучылар, әдәбият белгечләре һәм тәрҗемәчеләр генә түгел, аларның һәрберсе – кайсы да булса милли әдәби басманың вәкаләтле вәкиле дә. Моның шулай булуы очрашуга аерым бер мөһимлек өстәде, ни өчен дигәндә, алга таба дәвам ителәчәк хезмәттәшлек БДБ һәм Балтыйк буе илләреннән яңа авторларны эзләп табу, әсәрләрен тәрҗемә итү турында килешүләр төзүне, иҗатларын «Дружба народов» журналы битләрендә яктыртуны күздә тота.