«Аргамак–Татарстан» журналын тәкъдир итү

Агымдагы елның 10 нчы апреле көнне Татарстан Республикасы Милли китапханәсенең Зур уку залында (Казан, Кремль ур., 33 нче йорт) «Аргамак–Татарстан» әдәби-нәфис журналының (альманахының) 10 нчы юбилей санын тәкъдир итү кичәсе булды.

Әлеге кичәгә кунак булып журналны гамәлгә куйган «Татмедиа» ачык акционерлык җәмгыятенең җитәкчеләре, язучылар һәм шагыйрьләр, альманахның укучылары килде.

Басманың баш мөхәррире, шагыйрь Николай Алешков, дөньядагы гомуми финанс һәм икътисади кризиска карамастан, «Россиянең йөрәге булган Татарстанда», атап әйткәндә, күпмилләтле Яр Чаллы шәһәрендә, рус телендәге әдәби журнал чыга башлауны зур вакыйга дип бәяләде. Ул шулай ук журналның Калининградтан алып Владивостокка кадәр Россия төбәкләрендәге әдәби һәм иҗади көчләрне берләштерүгә хезмәт итүен ассызыклап әйтте.