«Без кабызган утлар»

Күпләребез яратып укый торган әдәби-нәфис һәм иҗтимагый-сәяси «Казан утлары» журналы чыга башлауга 2012 елның май аенда 90 ел тулды. 17 май көнне Г.Камал исемендәге Татар дәүләт академия театры бинасында журналның юбилей кичәсе булды. Театр фойесында Татарстан Республикасы Милли китапханәсенең кулъязмалар һәм сирәк китаплар, вакытлы матбугат бүлекләре китапханә фондларында сакланучы басмалардан әзерләнгән «Без кабызган утлар» дигән күчмә әдәби күргәзмә оештырдылар. Әлеге күргәзмәдә журналның төрле елларда (1922– 2012), төрле графикада (гарәп, латин, кириллица), төрле исемнәр белән («Безнең юл», «Атака», «Яңалиф», «Совет әдәбияты», «Казан утлары») чыккан саннары, аларда басылган әсәрләр һәм хезмәтләр, шулай ук журнал хакында төрле матбугат органнарында басылган мәкалә-язмалар урын алды.

«Казан утлары» журналы, исемен берничә тапкыр алмаштырса да, татар халкының төп әдәби журналы буларак, озак еллар буена (тагын ун елдан бер гасыр!) әдәбияттагы гына түгел, фән, мәдәният-сәнгать өлкәсендәге, милли-рухи тормышыбыздагы мәгълүматларны эзлекле яктыртып бара.

Журналның чыга башлавыннан алып, хәзерге көнгә кадәр барлык саннары да диярлек Татарстан Республикасының Милли китапханәсе фондларында кадерләп саклана. Кызыксыныгыз, килегез, файдаланыгыз!