2019 елның 14 ноябрендә Татарстан Республикасы Милли китапханәсенең сәнгать бүлегендә (Казан, Театр ур., 5 йорт) инструменталь музыка кичәсе узды.
Китапханәдә кунакта Халыкара һәм Бөтенроссия конкурслары лауреатлары Азиза Абдурәимова (скрипка) һәм Инна Макарова (фортепиано) булды. Бу кичәдә Ф. Шопен, К. Сен-Санс, Н. Паганини, С. Рахманинов, П. Чайковскийның классик әсәрләре генә түгел, танго стилендәге композицияләр, кинофильмнардан көйләр дә яңгырады. Яшь композитор Инна Макарова үзенең берничә әсәрен башкарды. Ә концерт ахырында татар композиторы Рөстәм Яхинның «Сүзсез җыр»ы башкарылу һәркем өчен матур бүләк булды.
Кичәнең искиткеч программасы һәм артистларның илһамлы чыгышы барлык музыка сөючеләрнең күңеленә хуш килде.