Мәдәният министрлыгы коллегиясендә – китап күргәзмәсе

2020 елның 30 гыйнварында «Иннополис» махсус икътисадый зонасында (А.С.Попов исемендәге технопарк, Университет ур., 7 йорт) Татарстан Республикасы Мәдәният министрлыгының 2019 ел эш нәтиҗәләренә һәм 2020 елга куелган максатларына багышланган киңәйтелгән коллегия утырышы булды.

Утырышта Татарстан Республикасы Президенты Рөстәм Миңнеханов, Россия Федерациясе Мәдәният министры урынбасары Ольга Ярилова һәм Милләтләр эшләре буенча федераль агентлык җитәкчесе урынбасары Михаил Ипатов катнашты. Чарага шулай ук муниципаль районнарның башкарма комитетлары җитәкчеләре, муниципаль районнарның мәдәният идарәләре (бүлекләре) башлыклары, республика мәдәният, сәнгать һәм кинематография учреждениеләре җитәкчеләре, ведомствога караган театр-концерт учреждениеләренең баш режиссерлары һәм сәнгать җитәкчеләре, иҗат берлекләре, иҗтимагый оешмалар җитәкчеләре килгән иде.

Шушы уңайдан коллегиядә катнашучыларга Татарстан Республикасы Милли китапханәсенең татар әдәбияты һәм туган якны өйрәнү бүлеге 2019 нчы елда төрле нәшриятларда басылып чыккан басмалардан торган, «Татарстан китаплары – 2019» дип аталган зур күргәзмә тәкъдим итте. Биредә шулай ук китапханәнең «Милли китап» нәшриятында дөнья күргән китаплары да күрсәтелде.

Әлеге күргәзмәдә Татарстанның һәм татар халкының тарихын, мәдәниятен, сәнгатен, җәмгыятьнең актуаль темаларын яктырткан басмалар урын алды. Шулай ук татар, рус һәм башка милләт язучыларының соңгы вакытта нәшер ителгән китаплары, гуманитар тармак галимнәренең хезмәтләре куелды.

Күргәзмә коллегиядә катнашучыларда зур кызыксыну уятты. Мәдәният министрлыгы җитәкчеләре аны оештыручыларга рәхмәт белдерде.