Бәхет эзләп
2020 елның 30 гыйнварында Татарстан Республикасы Милли китапханәсенең чит телләрдәге әдәбият бүлеге хезмәткәрләре «Мин – укучы» әдәби проекты кысаларында Казан шәһәре 3 нче гимназиясенең 3 нче сыйныф укучылары өчен Бельгия язучысы Морис Метерлинкның «Күк кош» пьесасы буенча китапханә дәресе үткәрделәр.
«Күк кош» пьесасында утын кисүче ярлы гаиләдән булган абыйлы-сеңелле Митиль һәм Тильтиль маҗаралары тасвирлана. Балалар тылсымлы күк кошны эзләргә юл тоталар, чөнки бу кошны бәхет һәм мәхәббәт символы диләр. Әкият сюжеты буенча ул сихри көчкә ия һәм бары тик ул гына тылсымчы ханымның авыру оныгын дәвалый ала.
Күк кошны тапканчы балалар тылсымлы илләрдә төрле маҗараларга эләгәләр. Юлны узып, үз өйләрендә уянгач кына Тильтиль үзенең урман күгәрченендә тылсымлы күк кошны танып ала.
Авторның идеясе болай: бәхет көндәлек мәшәкатьләрдә һәм вак-төяк эшләрдә күзгә күренмәгәннне күрә белгәнгә генә килә. Тильтиль урман күгәрченен күрше кызына бүләк иткән кебек башкалар да тирә-юньдәгеләргә ихтирамлы булсалар, дөнья күпкә яктырыр һәм тылсымлырак булыр иде.
Укучылар М.Метерлинкның иҗаты белән генә танышып калмады, ә үзләре үк кызыклы әкият дөньясына сәяхәт итте. Дәрес ахырында алар «Нәрсә ул бәхет?» дигән дивар газетасы ясадылар.
