Китапханәләрдә туган якны өйрәнүгә багышланган семинар

ТАССРның 100 еллыгын һәм Чүпрәле районының 90 еллыгын бәйрәм итү кысаларында 2020 елның 31 гыйнвары көнне Чүпрәле районында «Китапханәләрнең туган якны өйрәнү эшен оештыруда яңа алымнар» дип исемләнгән семинар узды.

Анда Татарстан Республикасы Милли китапханәсенең фәнни-методик бүлеге мөдире Люция Мәсхүт кызы Нәҗметдинова, баш китапханәчесе Зәйнәп Әбүгали кызы Җамалиева катнашты. Семинар кысаларында язучы Равилә Шәйдуллина-Мурат, ТРның атказанган сәнгать эшлеклесе Нурания Җамали белән очрашу оештырылды.

Китапханәләрдә «Туган як елъязмалары» алып барыла, анда авыл җирлегендә барган барлык әһәмиятле вакыйгалар чагылдырыла, туган якны өйрәнү буенча папкалар һәм альбомнар ясала, аларда авыл, район турында газета материаллары, гаилә архивларыннан кулъязма материаллар, танылган якташлары биографияләре саклана. Үзәк китапханәдә электрон музей булдырылган, анда Чүпрәле районының үткәне һәм бүгенгесе турында бай мәгълүмат тупланган. Семинарда Иске Шәйморза авылы китапханәсе хезмәткәре Ю.Г.Хөсәенова, Иске Чокалы авылы китапханәсе мөдире Р.И.Гафурова үзләренең эш тәҗрибәсе белән уртаклаштылар.

«Район юбилеен каршылап» дигән күргәзмә оештырылган, анда район тарихы турында китаплар, документаль материаллар тәкъдим ителгән. Шулай ук районның халык һөнәрчелеге һәм көнкүреше күргәзмәсе дә куелган иде.

Мәгълүмати технологияләр китапханәләрнең туган якны өйрәнү эшчәнлегендә дә мөһим юнәлешкә әверелде. Алар китап укучыларның туган якны өйрәнү мәгълүматларына үтемлелеген җиңеләйтергә, туган якны өйрәнү белән мавыгучы кешеләрнең күбесен берьюлы колачларга мөмкинлек бирә. Шушы җәһәттән «Районның бүгенгесе һәм үткәне» дигән электрон презентация дә күрсәтелде.

Семинарга йомгак ясап, Чүпрәле үзәкләштерелгән китапханәләр системасы директоры Г.З.Яфизова китапханәчеләр эшчәнлегенең уңай якларын билгеләп үтте һәм китапханәләрнең эзләнү-тикшеренү эшчәнлеген киңәйтергә, туган якны өйрәнү буенча проектларны һәм максатчан программаларны эшләүне активрак алып барырга тәкъдим итте.