Туган ягыңны бел һәм ярат!

Татарстанда 2020 ел ТАССРның 100 еллыгы елы дип игълан ителде.

Бу вакыйга республика өчен генә түгел, бөтен Россия өчен дә әһәмиятле. Шул уңайдан төрле чаралар үткәрелә.

Ел дәвамында Татарстан Республикасы Милли китапханәсенең вакытлы матбугат бүлеге «Туган ягыңны бел һәм ярат» дип исемләнгән күргәзмәләр циклы оештыра.

2020 елның 1 февраленнән 29 февраленә кадәр китапханәнең икенче бинасындагы уку залында (Казан, К.Маркс ур., 36 йорт), Ватанны саклаучылар көненә багышлап, «Ватанны саклауда татарстанлылар өлеше» дип исемләнгән яңа форматлы күргәзмә эшли. Аның үзенчәлеге шунда – экспонатлар чемоданга куелган һәм йөз ел элек кулланылган көнкүреш әйберләре һәм вакытлы матбугат басмалары урын алган. Анда Ватан данын саклаган, Республикабыз горурлана торган сугыш ветераннары, тыл хезмәтчәннәре турында сөйләнә.

«Чемоданда» күргәзмәсе буыннарның тере бәйләнешен сакларга, яшьләрдә 1941–1945 еллардагы Бөек Ватан сугышы ветераннары батырлыгына хөрмәт тәрбияләргә булыша.

Бөек Җиңүдә барлык халыкларның лаеклы өлеше бар. Татар халкының ул һәм кызлары, Бөек Ватан сугышының барлык хәлиткеч көрәшләрендә катнашып, үзләрен кыю итеп күрсәттеләр, җирдә тынычлык өчен гомерләрен бирделәр. Без геройларыбыз белән горурланабыз. Бернигә дә карамастан, алар Җиңүгә ышандылар һәм аны мөмкин кадәр якынайттылар.

Сугышчан батырлыклар хәзерге вакытта да башкарыла. Әфганчыларның, Чечня сугышларында катнашучыларның исемнәре дә мәңгегә безнең хәтердә калачак. Хәрби традицияләрне һәм хезмәт батырлыкларын данлы дәвам итүчеләр турында сез күргәзмәдә тәкъдим ителгән журналлар һәм газеталар аша таныша аласыз.

Күргәзмәдә «Азат хатын», «Коммунист Татарии», «Татарстан коммунисты», «Совет әдәбияты», «Казан утлары», «Панорама», «Кызыл Татарстан», «Красная Татария», «Социалистик Татарстан», «Яшь ленинчы», «Идел», «Китапханә хәбәрләре», «Мәйдан», «Татарстан», «Эхо веков» кебек басмаларны күрергә мөмкин.

Күргәзмәгә рәхим итегез!