Сәнгать бүлегендә «Игелекле эшләр көне»
2020 елның 31 гыйнварында Татарстан Республикасы Милли китапханәсенең сәнгать бүлегендә (Казан, Театр ур., 5 йорт) «7 нче Казан интернат-мәктәбе» дәүләт бюджет белем бирү оешмасының сәламәтлекләре җәһәтеннән мөмкинлекләре чикләнгән балалары кунакта булды. Очрашу «Һөнәр белән танышу» проекты кысаларында «Игелекле эшләр көне» хәйрия фонды ярдәмендә оештырылды.
Китапханә белән танышу программасы «Үзгәрүчән дөньяда китапханә: тарих һәм хәзерге заман» дип исемләнгән видеопрезентация белән башланып китте. Укучылар Мисырдагы иң борынгы Александрия китапханәсеннән башлап, дөньяның эре китапханәләренең, шул исәптән, Казанның иң әүвәлге һәм зур китапханәләренең берсе – Татарстан Республикасы Милли китапханәсенең бай тарихы белән таныштылар. Сәнгать бүлеге хезмәткәрләре китапханәче һөнәре, китапханәдә үз-үзеңне тоту кагыйдәләре, китап фонды, каталог һәм картотека системасы, китапханәдә файдаланучыларга күрсәтелә торган хезмәтләр турында җиткерде.
Китапханәчеләр уен формасында, мавыктыргыч итеп китаплар барлыкка килү тарихы турында сөйләде, укучыларга табышмакларга җавап бирергә, китаплар һәм китапханә турында шигырьләр һәм мәкальләр тыңларга тәкъдим итте. Сәнгатькә багышланган, махсус әзерләнгән кызыклы һәм гадәти булмаган китаплар җыелмасы да игътибардан читтә калмады. Архитектура һәм декоратив-гамәли сәнгать, рәсем һәм музыка, театр һәм цирк буенча матур альбомнар белән танышу мөмкинлеге балаларда бик күп уңай тәэсирләр уятты. Балалар тышлыгы балык тәңкәсеннән ясалган гаҗәеп китапны кулга тотып, битләрен ачып карый алдылар.
Балалар китапханәчеләрнең: «Китап укыгыз, күп белергә омтылыгыз, иҗат итегез һәм, һичшиксез, китапханәгә йөрегез!» дигән чакыруына уңай җавап бирделәр.
