Табигать язмышы – безнең язмыш

Табигать – безнең байлыгыбыз. Без табигатьне сакларга, якларга һәм яратырга тиеш. Хәзерге заманда экология проблемасы – иң мөһим проблемаларның берсе. Табигатьне саклау – ул үзебезне, киләчәгебезне, йортыбызны саклау дигән сүз.

2020 елның 4 февралендә Татарстан Республикасы Милли китапханәсенең вакытлы матбугат бүлеге хезмәткәрләре Казан шәһәре Идел буе районының татар телендә белем бирүче 18 нче номерлы гимназиясендә 4 нче сыйныф укучылары өчен «Табигать язмышы – безнең язмыш» дип исемләнгән Экология сәгате үткәрде. Балаларга экологик тәрбия бирүдә, табигатькә, тереклек ияләренә аңлы, сакчыл караш уятуда, кешелеклелек, мәхәббәт кебек хисләр тәрбияләүдә мондый чаралар зур әһәмияткә ия. Китапханә хезмәткәрләре укучыларга әйләнә-тирәбездәге табигатьнең матурлыгы һәм муллыгы югалмасын, челтерәп аккан чишмәләре кипмәсен, җир өсте чәчәккә күмелсен, анда кошлар сайрасын өчен, үзебезгә күп көч куярга, шуңа омтылып яшәргә кирәклеге турында сөйләделәр.

Алган белемнәрне ныгыту максатыннан, балалар белән викторина уены оештырылды. Укучылар бик актив катнаштылар, сорауларга кызыксынып һәм теләп җавап бирделәр.