Рус сәхнәсе даһие Фёдор Шаляпин

16 февральдә Татарстан Республикасы Милли китапханәсенең сәнгать бүлегендә (Казан, Театр ур., 5 йорт) «Дөнья музыка мәдәниятенең алтын фонды» ретро-кинозалы кысаларында бөек артист, опера җырчысы Фёдор Иванович Шаляпин турындагы «Бөек Шаляпин» документаль фильмы күрсәтелде. Ул 13 февраль – Ф.И.Шаляпинның туган көненә һәм бу көннәрдә Казанда узучы Ф.И.Шаляпин исемендәге Халыкара опера фестиваленә багышланган иде.

Фильмны карар алдыннан тамашачыларга Ф.И.Шаляпинның тормышы һәм иҗаты, җырчының Казанда узган балачагы турында әдәби күзәтү тәкъдим ителде. Казанда Шаляпин беренче тапкыр театр белән танышкан, сәхнәдә беренче адымнарын ясаган. 22 яшендә Фёдор Шаляпин Мариин театрының солисты була. Гастрольләр белән җырчы бөтен Европаны йөреп чыга: аны Париж, Берлин, Лондон, Америка алкышларга күмә, тамашачылар «Афәрин!.» дип кычкыралар. Рус артистының табигый музыкальлекне, көчле вокалны, гадәти булмаган актёрлык осталыгын берләштергән таланты бөтен дөньяда танылды. Фёдор Иванович Шаляпин рус операсын, М.Глинка, М.Мусоргский, Н.Римский-Корсаков, П.Чайковскийны дөньяга танытты. Ш.Гуноның «Фауст» операсында Мефистофель ролен башкаруы әлегәчә эталон буларак кабул ителә.

Фильмны карарга килүче тамашачылар сәнгать бүлеге фондларында сакланучы, Фёдор Иванович Шаляпинның тормыш юлы һәм иҗаты белән таныштыручы китаплар тупланмасы белән таныштылар.

«Ретро-кинозал» кысаларында киләсе очрашу 1 мартта 16.00 сәгатьтә (Казан, Театр ур., 5 йорт) узачак, бу көнне Джузеппе Вердиның «Риголетто» операсын карау булачак. Бу – Виктор Гюгоның «Король забавляется» пьесасы буенча режиссёр Жан-Пьер Поннель тарафыннан 1982 елда куелган нәфис кинофильм-опера. Фильмда Лучано Паваротти, Ингвар Викселл, Эдита Груберова һ.б., Венаның филармония оркестры, Вена дәүләт операсы хоры катнаша. Дирижер – Рикардо Шайи.

Барлык теләүчеләрне көтеп калабыз.

Керү түләүле – 50 сум. Билетны сәнгать бүлегендә чара башланыр алдыннан сатып алырга мөмкин.