Геройлар безнең арада
Ватанны саклаучылар көне уңаеннан 19 февральдә Татарстан Республикасы Милли китапханәсенең вакытлы матбугат бүлеге хезмәткәрләре Идел буе районындагы 24 нче мәктәпнең 4 нче сыйныф укучылары белән очрашу оештырдылар.
Очрашуның беренче өлешендә китапханәчеләр Татарстанның баш китапханәсе, аның тарихы, бүгенгесе турында сөйләделәр.
Бөек Ватан сугышында зур батырлыклар күрсәткән якташларыбыз турында Милли китапханә фондларында сакланучы газета һәм журнал материалларына күзәтү ясалды.
Китапханәчеләр Советлар Союзы Герое Михаил Петрович Девятаевның 75 ел элек – 1945 елның 8 февралендә күрсәткән кабатланмас батырлыгы турында аерым игътибар белән, тулырак итеп сөйләделәр.
Укучыларны «Родина», «Герои всех исторических эпох», «Армейский сборник» һәм башка журналлар белән таныштырып, туган шәһәргә, мәктәпкә, дусларга, якын кешеләргә карата ярату һәм хөрмәт хисләре уятырга тырыштылар.
Очрашу ахырында һәр укучы бердәм укучы билеты алды, киләчәктә дә очрашуларны дәвам итәргә теләк белдерде.
