Милли китапханә Халыкара фәнни-гамәли конференциядә

Халыкара туган тел көненә багышлап, 2020 елның 20–21 февраль көннәрендә Казан (Идел буе) федераль университетының Филология һәм мәдәниятара багланышлар институтында унберенче тапкыр «Төрки лингвокультурология: проблемалар һәм перспективалар» дигән Халыкара фәнни-гамәли конференция булып узды.

Конференциянең беренче көнендә төрки лингвокультурологиянең мөһим юнәлешләре, телнең җәмгыять һәм мәдәният белән бәйләнеше, тәрҗемә һәм мәдәниятара багланышлар; мәдәни-тарихи мирас һәм традицияләр кебек мәсьәләләр каралды. Шулай ук татар тел белеменең фәнни һәм гамәли проблемалары, татар әдәбиятында әдәби-эстетик эзләнүләр һәм башка шундый темалар хакында фикер алышулар булды.

Конференциянең икенче көне Татарстанның халык язучысы, Татарстан Республикасының Габдулла Тукай исемендәге Дәүләт премиясе лауреаты Әмирхан ага Еникинең тууына 110 ел тулуга багышланды һәм аның тормыш юлын, иҗатын сурәтләгән фотокүргәзмә ачу белән башланып китте. Аннан соңгы чараларның тантаналы өлешен Казан (Идел буе) федераль университетының Филология һәм мәдәниятара багланышлар институты директоры Рәдиф Рифкать улы Җамалетдинов ачып җибәрде.

Соңыннан конференция үз эшен секцияләрдә дәвам итте.

Әлеге Халыкара фәнни-гамәли конференцияне үткәрүдә Татарстан Республикасы Милли китапханәсе дә үзеннән өлеш кертте. Казан (Идел буе) федераль университетының Татарстан урамы, 2 нче йорт адресы белән урнашкан бинасындагы күргәзмәләр залында Милли китапханәнең татар әдәбияты һәм туган якны өйрәнү бүлеге хезмәткәрләре Әмирхан Ениинең тууына 110 ел тулуга багышланган «Рухи матурлык җырчысы» дигән күргәзмә куйды. Әдипнең китапханә фондларында сакланучы барлык китаплары, аның иҗатына багышланган хезмәтләр һәм мәкаләләр күрсәтелде. Татар әдәбияты һәм туган якны өйрәнү бүлеге хезмәткәрләре чарада катнашкан кунакларны күргәзмәгә куелган китаплар белән җентекләп таныштырды.

Конференция ахырында Казан (Идел буе) федераль университетының Филология һәм мәдәниятара багланышлар институты җитәкчелеге чарада катнашучыларга һәм Милли китапханә хезмәткәрләренә ихлас рәхмәт сүзләрен җиткерде һәм истәлекле бүләкләр тапшырды.