Г.Ибраһимов исемендәге Тел, әдәбият һәм сәнгать институты проектларын тәкъдим итү
2020 елның 20 февралендә Татарстан Республикасы Милли китапханәсе хезмәткәрләре Татарстан Фәннәр Академиясенең Г. Ибраһимов исемендәге Тел, әдәбият һәм сәнгать институты проектларын тәкъдим итү кичәсендә булдылар. Чара 21 февральдә билгеләп үтелүче Халыкара туган тел көненә багышланган иде.
Институт галимнәре яңа фәнни проектлары белән таныштырды: татар телен туган тел буларак өйрәнүче башлангыч гомуми белем бирү оешмалары укучылары өчен «Туган тел (татар теле)» дигән укыту-методик комплектын һәм «Татар теле сүзлекләренең электрон фонды»н тәкъдим иттеләр. Язма һәм музыкаль мирас үзәге хезмәткәрләре яңа сайтлары һәм транслитерация программасы турында сөйләделәр.
Бу проектлар 2019 елда гамәлгә ашырылган, ләкин аларны эшләп бетерү һәм камилләштерү дәвам итә.
Чарада шулай ук идарә оешмалары вәкилләре, галимнәр, журналистлар, җәмәгать эшлеклеләре, мәктәп һәм югары уку йортлары мөгаллимнәре катнашты.