Төрледән-төрле әлифбалар

2020 елның 25 февралендә Татарстан Республикасы Милли китапханәсенең чит телләрдәге әдәбият бүлеге хезмәткәрләре «Бөтен дөнья сезнең учыгызда» проекты кысаларында Казан шәһәре 36 нчы гимназиясенең беренче сыйныф укучылары белән очрашты.

Күптән түгел генә балалар гимназиядә әлифбаны өйрәнүләрен тәмамлаганнар.  

Китапханәчеләр балаларга кешелекнең даһи ачышларыннан берсе – хәреф турында сөйләде. Хәреф тарихы дигән мавыктыргыч маҗарага укучылар «һава шары»нда юл тотты. Сәяхәтнең башында балалар пиктограмма һәм логограммаларның нәрсә икәнен белделәр.

Беренче тукталыш – Кытай. Кытайда яшәгән борынгы кешеләрнең язуы бизәкләр, орнаментлар ясау алымнарын үстерү, рәсем сәнгате һәм сынлы сәнгать белән бәйле булган. Алар дөньяны күреп аңлауга нигезләнгәннәр, шуңа күрә кытайларда матур язу хәзер дә беренче урында тора. Укучылар, кытай теле дәреслеген ачып карагач, моңа үзләре дә инанды.

Икенче тукталыш – Германия. Балалар бу ил телен – алманчаны – ничек белүләрен күрсәтте. Шулай ук укучылар викториналарда катнашты, Франциядә «булып кайттылар». Ә Италиядә Пиноккио әкиятен искә төшерделәр. Әсәрдәге төп каһарманның маҗаралары нәкъ менә әлифба аркасында башлана да бит инде!

Мавыктыргыч сәяхәтнең ахырында 35 беренче сыйныф укучысы Пиноккионыкы кебек башлыклар ясады, әлеге башлыклар инглиз теле хәрефләре белән бизәлгән иде.

Соңыннан балалар истәлек өчен күмәкләшеп фотога төштеләр.