Кукмара районында иҗади очрашу

«Ел китабы» Республика конкурсын оештыру һәм үткәрү кысаларында 26 февраль көнне Кукмара районы Үзәк китапханәсендә язучы, шагыйрә, эшкуар Равилә Шәйдуллина-Морат һәм Америкада яшәүче милләттәшебез, галимә, татар әдипләренең әсәрләрен рус теленә тәрҗемә итүче Сөрәйя Гайнуллина белән очрашу узды.

Чараны оештыручылар – «Татарстан Республикасы Кукмара муниципаль районы үзәкләштерелгән китапханәләр системасы» муниципаль бюджет оешмасы һәм Татарстан Республикасы Милли китапханәсенең фәнни-методик бүлеге хезмәткәрләре.

Очрашуга килүчеләр Равилә Шамил кызының «Ел китабы–2016» Республика конкурсында җиңгән «Ялантауга ай кунган» һәм 2019 елда басылып чыккан «Карт шомырт хатирәсе» китаплары турында фикер алышты. Балалар китапханәсе хезмәткәрләре «Карт шомырт хатирәсе» әсәреннән сәхнәләштерелгән өзек күрсәтте.

Шулай ук Сөрәйя Гайнуллина тарафыннан  рус теленә тәрҗемә ителгән әсәрләр укылды, сөйләүле чыгышлар музыкаль номерлар белән үрелеп барды.

Кичә ахырында Равилә Шамил кызы белән Сөрәйя Мәлик кызы, китап укучыларның сорауларына җавап биреп, киләчәккә иҗади проектлары турында сөйләделәр һәм очрашуны оештыручыларга, китап сөючеләргә рәхмәт сүзләрен җиткерделәр.