«Киләчәк буын онытмас мине...»

Шушы елның 15 мартына кадәр Татарстан Республикасы Милли китапханәсенең күргәзмәләр залында (Казан, Кремль ур., 33) Е.А.Баратынскийның 220 еллыгына багышланган  «Киләчәк буын онытмас мине...» дигән китап күргәзмәсе эшли.

Евгений Александрович Баратынский – XIX гасыр башында иҗат иткән талантлы рус шагыйре, Пушкинның фикердәше, фәлсәфи шигырьләрне башлап язучы. Ул язган шигырьләр бүген дә ихласлыгы, фикер тирәнлеге һәм әхлакый сафлыгы белән аерылып торалар. Баратынскийның иҗаты  поэзия үсешенә зур йогынты ясаган һәм ясый.

Күргәзмә шагыйрьнең балачагы һәм яшьлеге, танылган дуслары А.Пушкин, А.Дельвиг, Д.Давыдов турындагы материаллар белән ачыла. Баратынскийның иҗаты һәм тормыш юлы китапханә фондларыннан алынган газета һәм журнал битләрендә дә чагыла. Китап укучылар өчен шагыйрьнең әсәрләре, замандашларының истәлекләре, әдәбият белгечләренең Баратынский иҗатын анализлаган хезмәтләре дә кызыклы булыр. Күргәзмәдә шагыйрьнең төрле елларда төрле нәшриятларда басылган әсәрләре дә урын алган. Аның биографиясенең Казан белән бәйләнешле өлеше аерым игътибарга лаек.

Безнең шәһәрдә Евгений Баратынскийның музей-йорты бар. Шагыйрь Казанда яшәмәгән, ләкин өч буын Баратынскийларның тормышы Казан белән бәйле. Шул чорны чагылдыручы фоторәсемнәр, мәкаләләр күргәзмәне баета. Шагыйрь яшәгән Мураново авылы турындагы китаплар да Баратынский иҗатын тулырак күзалларга ярдәм итә.

Килегез! Милли китапханә  шигърият сөючеләрне көтеп кала!