Яраткан артистларыбызның таныш йөзләре

Татарстан Республикасы Милли китапханәсенең күргәзмәләр һәм мәдәни программалар бүлеге (Казан, Кремль ур., 33 йорт) язны «Яраткан артистларыбызның таныш йөзләре» дип аталган күргәзмә белән каршылый. Ул 27 мартта билгеләп үтелүче Халыкара театр көненә багышланган.

Тарихның һәр елы үз гомерен әдәбият, сәнгать, театрга багышлаган шәхесләрнең юбилейлары белән аерылып тора. 2020 ел да театр сәнгате осталарының юбилейларына шактый бай. Безнең күргәзмә Татарстан вәкилләре иҗатына багышлана. Күпсанлы китаплар һәм журналлар күренекле артистларның фидакяр хезмәте турында сөйли. Галиәсгар Камал исемендәге Татар дәүләт академия театры артистлары арасында юбилярлар аеруча күп. Әзһәр Шакиров, Хәлим Җәләлов һәм Наилә Гәрәеваларга 80 яшь, Илдар Хәйруллин, Рузия Мотыйгуллина, Луара Шакирҗан һәм Илдус Әхмәтҗаннарга 2020 елда 70 яшь тула. Республиканың башка театрларында да юбилярлар бар.

Түгәрәк дата – күренекле артистларның иҗатына тиешле бәя бирү, тантаналы чаралар үткәрү, тормыш сукмаклары турында уйлану өчен матур мөмкинлек.

 Күргәзмә геройлары киләчәктә дә сәхнәдә балкып, яңа рольләре белән безне куандырсыннар иде.