Япониянең Кобе шәһәре татар җәмгыяте тарихы документлары архивка тапшырылды

Милли китапханәнең кулъязмалар һәм сирәк китаплар бүлеге мөдире Айрат Заһидуллин һәм бүлекнең фәнни хезмәткәре Ильяс Мөстәкыймов Татарстан Республикасының Архив эше буенча дәүләт комитетына Япониянең Кобе шәһәрендәге татар җәмгыяте тарихына караган документларны тапшыру мәрасимендә катнаштылар. Ул Татарстан Республикасы Фәннәр академиясенең Ш. Мәрҗани исемендәге Тарих институтында узды.

Тапшырылган ядкәрләр Кобедагы татар җәмгыятендә торган гаиләләр һәм аерым әгъзаларның 1940–1950 нче елларга караган документларыннан һәм Кобедагы мәчетнең соңгы татар имамы Хөсәен Килки китапларыннан гыйбарәт. Шулар арасында Коръән тәфсирләре, татар, япон, аурупалы галимнәрнең Ислам турындагы китаплары һәм башка басмалар бар. Бу ядкәрләр мөһаҗирлектә яшәүче милләттәшебез Рәкыйбә Килкинең гаилә архивында сакланган.

Чарада катнашучылар бу тупланманың барлыкка килү тарихы һәм тапшырылган документлар күргәзмәсе белән таныштылар.