Ә.Мәҗитов музеенда Туган тел бәйрәме

Телләрнең һәм мәдәниятләрнең күптөрлелеген саклау максатында 1999 елның 17 ноябрендә ЮНЕСКО Генераль конференциясенең 30 сессиясендә 21 февральне Халыкара туган тел көне дип игълан итү турында карар кабул ителде. Берләшкән Милләтләр Оешмасы (БМО) генераль Ассамблеясы бу инициативаны хуплады. Хәзер бу истәлекле датаны җир шарының бөтен ил-төбәкләрендә дә билгеләп үтәләр.

2020 елның 27 февралендә Ә.Мәҗитов музеенда Халыкара Туган тел көненә багышланган «Тел дигән дәрья бар» исемле зур әдәби-музыкаль кичә булып узды. Әлеге кичәне Милли мәдәният музее хезмәткәрләре оештырды.

Кичәдә татар әдәбияты белгече, КФУ профессоры, филология фәннәре докторы, Татарстанның һәм Россиянең атказанган мәдәният хезмәткәре, ТР Язучылар берлеге әгъзасы Фоат Галимулла улы Галимуллин, Камал театры актеры, Россиянең һәм Татарстанның халык артисты, Татарстанның Габдулла Тукай исемендәге Дәүләт премиясе лауреаты, Татарстанның М.Җәлил исемендәге бүләге лауреаты Равил Шиһап улы Шәрәфиев, сәнгать белгече, шагыйрә, тәрҗемәче, ТР Рәссамнар, Язучылар берлекләре әгъзасы, Татарстан Республикасының Габдулла Тукай исемендәге Дәүләт премиясе лауреаты Розалина Гомәр кызы Шаһиева, Татарстанның халык артисты, җырчы Фердинанд Рафаил улы Фәттрахманов һәм Казан шәһәре 96 нчы гимназиясенең татар теле һәм әдәбияты укытучылары һәм укучылары катнашты.

Кичәне музейның өлкән фәнни хезмәткәре Рәмзия ханым Хәлиуллина ачып җибәрде. Чакырылган кунакларның чыгышлары сәнгать әһелләренең һәм гимназия укучыларының музыкаль номерлары белән үрелеп барды.

Әлеге чараны оештыруда һәм үткәрүдә Татарстан Республикасы Милли китапханәсе дә үзеннән зур өлеш кертте. Ә.Мәҗитов музее күргәзмәләр залында Милли китапханәнең татар әдәбияты һәм туган якны өйрәнү бүлеге, вакытлы матбугат бүлеге хезмәткәрләре тарафыннан «Әдип һәм галим», «Яратыгыз туган телегезне» дип аталган бай күргәзмәләр куелды. Китапханә фондларында сакланучы тел тарихына караган һәм Татарстанның халык язучысы Нәкый ага Исәнбәтнең тормышын һәм иҗатын чагылдырган документлар күрсәтелде. Очрашуда Милли китапханә хезмәткәрләре: вакытлы матбугат бүлегенең сектор җитәкчесе Рәзинә Хәйретдинова, татар әдәбияты һәм туган якны өйрәнү бүлегенең әйдәп баручы китапханәчесе Римма Мусина катнашучыларны күргәзмәгә куелган китаплар, газета-журналлар белән җентекләп таныштырдылар.

Очрашу ахырында Милли-мәдәни музей җитәкчелеге кичәдә катнашучыларга ихлас рәхмәт сүзләрен җиткерде.